Iratiko Oihana Nafarroan dago eta munduko mendi-ibiltarien lekurik gogokoena bihurtu da, gaur egun. 17 mila hektareako leku zoragarri hau Europako pagadi-izeidirik handiena da, Alemaniako Oihan Beltzaren ondotik.
Naturak eskaini digun altxor liluragarri hau ikusgarria da bisitari ororentzat, Iratiko Oihaneko ibilbideek sekulako ospea dute munduan, arras paisaia ederrez eta zoragarriz beterik dago, eta merezi du merezi duenez hona etorri eta zuzenean ikustea.
Nafarroa eta Frantzia artean kokatua, arrunt leku aproposa da hamaika jarduera egiteko eta naturaren erdian jostatzeko. Aukera honen bidez, informaziorik onena eskaintzen dizugu Iratiko Oihana ezagutzeko eta haren lurraldean dagoen oro erakusteko.
Nola iritsi Iratiko Oihanera?
Iratiko Oihana ederki gozatze aldera, Iratiko bi sarbideetako batera joan beharko dugu Iruñetik abiaturik. Iratiko Oihanean sartzeko lehen atea Aezkoan dago, eta, bertzea, berriz, Zaraitzun.
Iratiko Oihanera iristeko aukeratzen duzun sarbidea edozein delarik ere, hainbat ibilbide izanen dituzu eskura gauza miragarriz beteriko bazterrak ezagutzeko. Sarrera eremu bakoitzak hainbat aukera eskaintzen dizkizu, guztiak ere aintzat hartzeko modukoak, baina onena da aukeraz baliatzea eta hainbat bidaia antolatzea Iratiko Oihaneko ibilbide guztiak ezagutzeko eta gogokoena duzun huraxe aukeratzeko.
Iratiko Oihanera sartzeko ateek sekulako aukera emanen digute herri zoragarriei darien edertasuna miresteko. Bata, Orbaizeta; bertzea, Otsagabia, zein baino zein liluragarriago, biak ere nahitaez ikusi beharrekoak Nafarroako funtsik adierazgarriena gozatzeko.
-
AEZKOA ALDEKO SARRERA
Aezkoan barna, Orbaizetatik sartuko gara. Herria 60 km ingurura dago Iruñetik. Gehienez, hirurogei minutu dira, eta biderik laburrena da, Iruñetik abiaturik.
Sarbide hori aukeratzen badugu, Irabiako urtegiraino iritsiko gara; han, bada aparkalekua, bai eta askaldegiak, mahaiak eta aulkiak ere, informazio guneaz gainera, bisitariei argibideak emateko.
-
ZARAITZU ALDEKO SARRERA
Aezkoako sarbidea ez bezala, Zaraitzu aldekoa 85 kilometrora dago Iruñetik eta Otsagabian barna sartu beharra dago Iratiko Oihanean. Herri ederra da zinez, paisaia zoragarriz inguraturik eta etxe zahar ederrez beterik.
Zaraitzu aldeko sarrerak Otsagabia eta Iratiko Etxe ezagunak gozatzeko parada emanen die bisitariei. Han ere, bisitariarendako informazio-zerbitzuak daude, bai eta Iratiko Oihaneko aparkalekua, askaldegiak eta taberna-jatetxea ere.
Sarbide bakoitzean, badira hainbat zerbitzu, hala nola aparkalekua, jatetxeak eta osatuak; beraz, ez duzu zertaz kezkaturik Iratiko Oihanera etortzen zarenean.
Zenbat balio du Iratiko Oihanera joateak?
Oihanak dituen gauza onen artean, sarrera tasak daude, arras merkeak baitira, naturak eskaini dizkigun paisaiei darien edertasun izugarriaren aldean. Leku zoragarri honek bi prezio finko ditu bisitarientzat.
Oihanetik hurbileko herrietan ostatu harturik daudenek bonu laranja izeneko hobari bat dute eta, horren bidez, 2€ bakarrik ordaindu behar dute ibilgailu bakoitzeko. Ibarretako batean ostatu harturik ez daudenek onura hori ere gozatuko dute, baldin eta bi herrietako edozein jatetxe edo dendatan 15€-tik gorako kontsumoa egiten badute.
Bertzalde, Iratiko Oihanetik hurbileko herrietan ostatu harturik ez daudenek eta arestian aipaturiko 15€ horiek establezimenduetako batean kontsumitu ez dutenek, 5€-ko txartel hori ordaindu behar dute Oihanean sartzeko. Iratiko Oihaneko sarrera kostua garrantzitsua da leku zoragarri hau mantentzeko; beraz, bi ordainketa aukeretako edozein oso lagungarria da Oihana zaintzen laguntzeko.
Iratiko Oihaneko Ibilbideak
Iratiko Oihaneko Ibilbideak oihan honetako gauzarik erakargarrienak dira. Inguru zabal honetan, badira ibilbide eta bide aunitz, guztiak ere bisitarien liluragarri. Bi sarbideetatik abiaturik, aukera sorta ezin hobea izanen dute eskura hala mendizaleek nola zuhaitzez nahiz landaretzaz inguraturik ibilaldi xume bat egin nahi dutenek.
Horrela, bi sarrera eremuetatik, hala Aezkoatik nola Zaraitzutik, badira era aunitzetako bideak, denok egin beharrekoak gure bizitzan lehenago edo geroago. Hemen, Iratiko Oihaneko ibilbideak oro erakutsiko dizkizugu zure gozamenerako.
-
IRATIKO OIHANEKO IBILBIDEAK AEZKOATIK ABIATURIK
Aezkoa aldetik sartzen bagara, ibilbide aunitz egiteko parada izanen dugu, guztiak ere naturaren erdian, kolorez beterik eta zuhaitz ikusgarriz inguraturik. Naturan ibilaldiak egitea maite dutenek ez dute inola ere galdu behar Aezkoa aldetik eskura dauden ibilbideak egiteko aukera.
Orbaitzetatik abiatuko gara ibilbideak gozatzeko, behin aparkalekura eta harrerara iritsitakoan. Han berean, Iratiko Oihaneko ibilbideak egiteko behar duzun informazio guztia emanen dizute.
Gune honetan, hainbat ibilbide dituzu, hala nola Anbulolatz ibilbidea, Azalegiko ibilaldia, Plaza Beunza arteko ibilbidea, Ursarioko Oihaneko ibilbidea, eta Mendilazko eta Arlekia – Lauzarango ibilbideak. Irabiako Urtegiaren itzulia eta Paradisuak Erlan izeneko ibilbideak ere nabarmenak dira eta ez zenuke galdu behar bi horiek egiteko aukera.
Ikusten duzunez, era aunitzetako ibilbideak eta bideak ditugu Aezkoatik abiaturik, mendizale trebea izan gabe. Iratiko Oihana lurralde zoragarria da, jende guztiak ezagutu beharko lukeena; beraz, ez galdu hemengo oihanak eta ibilbideak ezagutzeko parada.
-
IRATIKO OIHANEKO IBILBIDEAK ZARAITZUTIK ABIATURIK
Otsagabitik abiatuko gara eta, behin Oihanean sarturik, ibilbide sorta handia izanen dugu eskura Iratiko Oihanean barneratzeko eta munduko paisaiarik ikusgarrienak gozatzeko.
Zaraitzu aldetik abiatzen diren ibilbide nabarmenen artean, hainbat dira azpimarratzekoak, hala nola zentzumenen bidea, Urbeltza ibaiarena, Goñinburuko behatokia eta Zabaletako Oihaneko bidexka, Abodiko gainetako ibilbide arras ezagunaz landara.
Alde horretatik, oihaneko bide guztietan barna zabiltzala, Iratiko Oihaneko bazter eta txoko zoragarriak bezain ikusgarriak ikusiko dituzu. Beraz, Iratiko Oihaneko ibilbiderik onenak ezagutzea pentsatu baduzu, guztiak egin beharko dituzu, den-denak ikusgarriak baitira.
Zer ikusi Iratiko Oihanean?
Espainia guztiko izeidirik ederrenez gain, Iratiko Oihanak leku zoragarriak ditu, denok ezagutu beharrekoak, bai eta hamaika txoko eder ere naturaren erdian. Herrietan Nafarroako arkitekturaren onena miretsiko dugu, bai eta ikusi beharreko hainbat monumentu ere.
Anduña ibai bazterrean, etxe ederrak daude eraikiak, landa-estilo paregabean altxatuak. Otsagabia zeharkatzean, lore ederrez apaindutako balkoiak gozatuko dituzu, teilatu pikoko etxeetan.
Pagoen, pinuen eta Otsagabiko errepide harriztatuaren artean dauden gauza erakargarrien artean, Erdi Aroko zubi bikaina dago, Nafarroan dagoen Iratiko Oihanaren postalik ezagunenen apaingarri. Monumentu idilikoa da, ezin hobea amodiorako txoko bat nahi duten maiteminduendako, landaretza sarriaren erdian kokatua.
Iratiko Oihanean ikusi beharreko monumentuen artean, Urrutiako, Iriarteko eta Donamariako jauregiak aipatu behar dira. Horrez gain, Muskildako Gure Amaren Santutegia eta XVII. mendeko etxe ederrak.
Ostatuak Iratiko Oihanean
Iratiko Oihanean ostatu hartzko tokiak era aunitzetakoak dira zinez, hala prezioan nola diseinu arkitektonikoetan. Izan ere, badira hotelak, apartamentuak eta Iratiko Oihaneko landa ostatu ezagunak.
Iratiko Oihaneko landetxeak aukera ezin hobeak dira taldeentzat, bai eta sukalde zerbitzuak nahiz espazio komunak nahi dituztenentzat ere. Etxe polit eta erosoak dira, 4ko eta 6ko taldeendako eta jende gehiagorendako ere diseinatuak.
Apartamentuak ere aukera bikainak dira taldeentzat; hori dela eta, gomendagarria da informazioa jasotzea aukera horren kostuez eta kokapenaz, Iratiko Oihanean ostatu hartzeko.
Nabarmendu behar da ostatu mota guztiak Iratiko Oihanetik arras hurbil daudela; hortaz, ez da inola ere tarte luzerik ostatutik, ezta ibilbideetara joateko sarbideetatik ere.
Iratiko Oihaneko ostatu aukerez gain, abenturazaleenek kanpin-dendan lo egiteko aukera izanen dute, kanpatzeko prestaturik dauden leku berezietan. Kanpinlariek hobekien baloratutako esperientzietako bat da, sekulako aukera naturarekin are harreman zuzenagoak izateko.
Noiz joan Iratiko Oihanera?
Gehienak bat heldu dira, hots, Iratiko Oihanera joateko urtarorik onena udazkena da, oihanetako kolore sorta oparo bezain liluragarria begiz gozatzeko. Dena den, udaberrian eta udan ikuspegi eder-ederrak gozatuko ditugu eta argazki ikusgarriak egiteko parada izanen dugu.
Egia errateko, Iratiko Oihana ederki diseinatua dago urte osoan bisitatzeko. Neguan, konparaziora, eguraldi hotzaren eta lainoaren eraginez, pelikula batean zeudela sentituko duzu. Ikuspegi zabalik ez badago ere, klimak liluratu eginen zaitu.
Oihanari darion xarma eskura duzu urteko 365 egunetan, eta gozamen hutsa da izeidi honek soilik eskaini ditzakeen leku zoragarriak ezagutzea.
Ez du axola zer urtarotan bisitatzen dugun Iratiko Oihana, baina garrantzitsua da kontuan hartzea goizeko 10etatik arratsaldeko 7etara dagoela zabalik. Beraz, gure gomendioa da ahalik eta goizen iristea, ibilbide bat baino gehiago egiteko astia izan dezazun.
Iratiko Oihana bisitatzeko aholkuak
Arestian erran dugun bezala, Oihaneko gauza erakargarri nagusiak ibilbide ugariak dira, guztiak ere ederrak bezain zoragarriak berez. Horregatik, Oihanera etorriz gero, garrantzitsua da hainbat gomendio kontuan hartzea ibilbideetako edozein egiterakoan.
Jendearen segurtasunerako, beren txakur maskota daramaten bisitariek lotua edukiko dute uneoro. Garrantzitsua da animalia eta gainerako bisitariak zaintzea; horregatik, txakurrak ez du lotu gabe ibili behar.
Janaria eta bertze gauza batzuk eramaten badituzu, poltsa bat ere eraman beharko duzu zaborrak gordetzeko eta oihanean hondakinik ez uzteko. Iratiko Oihana zaintzea bisitari guztien ardura baita; beraz, utzi lekua aurkitu duzun bezalaxe.
Edozein ibilbide egitean, jantzi oinetako erosoak, bidez bide ibiltzeko modukoak. Oinetakoez gain, eraman ura, bidean barna zure gorputza hidratatzeko.
Otorduak egiteko leku onena askaldegiak dira. Sarbideen sarrerako guneetan daude.
Bidaiarik onena egin nahi baduzu Iratiko Oihanera, bete eman dizugun aholku bakoitza. Oroitu, halaber, bisitari arduratsua izan behar duzula, eta oihan zoragarri honetako naturguneak zaintzen lagundu behar duzula.
Iratiko Oihanaren mapa
Hona hemen Iratiko Oihanaren mapa, ibilbide onenak, sarbideak eta bisitatu beharreko leku interesgarriak kokatzeko.
Informaziorik osoena eman dizugu Iratiko Oihana Nafarroan Gidari buruz. Izeidi ikaragarri honek beso zabalik hartuko ditu bisitariak, pentsa ditzakezun paisaia naturalik ederrenak oparitzeko,
Ez galdu Iratiko Oihana bisitatzeko eta ibilbide bat baino gehiago egiteko aukera, dela oinez, dela zaldiz, dela bizikletaz, zure gustuekin bat. Oihan hau leku zoragarria da abenturarako, aisiarako, gozamenerako eta ederki pasatzeko.
