Irati-ko Oihanaren koloreak
Urtaroek ezin konta ahala kolore margotzen dituzte Iratiko Oihanean; udazkenak, bereziki. Zaila da zinez natur paradisu honetaz ez maitemintzea.
Liburuetan idatzia da Iratiko Oihana Europa osoko pagadi-izeidirik handiena dela, bai eta hobekien kontserbaturik dagoena ere, Alemaniako Oihan Beltzaren ondotik. 17.000 hektareako oihan azalera dauka, Nafarroako Pirinioen erdian.
Guk ederki dakigu aunitzez ere gehiago dela. Kolore opari ederra urtero orotan; hori bai, udazkenari darizkion urre koloreak eta okreak nahiago, bai eta udaberriak dakarkigun berde sorta oparoa ere. Zereginez ahazteko eta indarrak berritzeko txokoa, presak eta betebeharrak zokoratzeko lekua. Toki goxoa, jende guztiari irekia, ezin hobea familia, talde, bikote eta abenturazale bakartiendako.
Nola iritsi Erron barna
Hartu Iruñetik Orreagara Zubirin barna doan N-135 errepidea Aurizko bidegurutzeraino. Hortik, NA-140 toki errepidea Aezkoara, Aribera arte, eta Ariben, Orbaizetara doan errepidea.
Nola iritsi Agoitzen barna
Gomendagarria Iruñetik Agoitzera doan errepidea hartzea, erosoagoa baita. Agoitzeko bidegurutzean Auritzerantz joko dugu, baina gero, Orotz Betelu eta Olaldeara hartu, eta bertze bidegurutze batean, berriz, Aezkoako errepidea, 1. aukeran bezala. Behin Orbaizetan, Azpegirantz eginen dugu Arma Olan barna, edota Irabiako urtegirantz, Larraun auzoa gurutzaturik.
APP IRATI
Aplikazio hau 3D murgilkorrean egina dago, eta arras egokia da Irati aldeko lurraldeak udan eta neguan duen aberastasuna ezagutzeko; Zuberoan, Garazin, Aezkoan eta Zaraitzun, hain zuzen. Ezagutu edo berrezagutu Iratiko oihaneko natur txokorik zoragarrienak.
Aise erabiltzen da mendi-ibiliei buruzko gida hau, bai eta mapa elkarreragilea ere; onlinetik kanpo ere erabil daiteke.
○ Kontrol intuitiboak eta zehatzak … hatz-mamiekin
○ Aireko ikuspegia, gainetik hegan
○ Ikuspegia eta mugimendua lurrean
○ Ipar-orratza
○ Geolokalizazioa
○ Deskribapen zehatzak, testu bidezkoak eta ikusizkoak
○ Zuzeneko bistaratzea 3D moldean
